Búið er að fjarlæga stóru olíubirgðatankana í olíuporti Skeljungs, þaðan sem varaaflstöð og kyndistöð við Mjósund Ísafirði hafa haft beina tengingu með leiðslu frá því að þessar stöðvar voru gangsettar.
Samið var við Skeljung um að útvega Orkubúinu 50.000 lítra olíubirgðatank, sem mun þjóna olíumálum fyrir stöðvarnar.
Olíutankurinn er kominn og er nú verið að tengja hann til bráðabirgða inni í porti Skeljungs sem senn verður aflagt. Ísafjarðarbær þarf að samþykkja staðsetningu tanksins inná lóð OV og einnig þarf að fjarlægja geymslutank á lóð OV til að skapa nægjanlegt pláss fyrir þann nýja. Að þessu fengnu verður hægt að m.a. skipta um jarðveg og steypa undirstöður undir tankinn sem er nauðsynlegt áður en honum verður komið fyrir inná lóð Orkubúsins við Mjósund.
